kasal

uulitin ko, hindi ko hinihingi ang basbas ninuman. hindi mahalaga sa'kin ang pahintulot ng batas o ng simbahan. hindi mahalaga ang matrimonya ng kasal. hindi ritual ang magbubuklod sa atin at hindi ko hahayaang ang pag-iibigan ay katatampukan ng samu't-saring palabas na hindi naman nauunawaan kung bakit kailangang may aras, kandila o mga abay.

ikakasal ka sa akin at ako sa iyo, hindi sa templo kundi saan mang may pagkakataong magkasarilinan tayo. magpapalitan ng katapatan, maghahayag ng nararamdaman, mangangako ng pakikiisa ng damdamin, sa lugar na naipapahayag ko ang sarili ko sa iyo at ikaw sa akin ng walang halong pagkukunwari. dito paulit-ulit nating pagbibigkisan ang ating mga pangako. paulit-ulit nating ihahahayag ang ating damdamin. paulit-ulit tayong magtitipan. ikakasal tayo sa tuwing nagkakasarilinan, nagkakaunawaan matapos ang alinlangan o gusot na pinagdaanan.

sa pagitan natin ang pananampalatayang may lumikha na nakauunawa sa atin, na hindi tayo hinuhusgahan at lalo tayong minamahal, pagkat ang pag-ibig nati'y singwagas ng kanyang pagmamahal, puno ng katapatan. Kabutihan ang ugat ng ating pag-iibigan.

ang mahalaga hindi ba ay ang pag-ibig na totoo? Malaya.