Ikaw,

paggising ko kanina, naramdaman ko ng iba ang araw na'to.

may kung anong kumurot sa dibdib ko. nagtext ang ex ko pero alam kong hindi sapat ang hapdi ng naramdaman ko para sabihing siya nga siguro ang dahilan kung bakit iba ang araw na'to.

ayoko naman talagang talakayin kung ano ang nararamdaman ko sa'yo. para sa'kin tapos na tayo.  lalo namang ayokong bigyan ka ng puwang sa blog na'to pero sige, once and for all, para may idea ka sa nararamdaman ko sasabihin ko na... sobra mo kong hindi nirespeto. Galit ako hanggang ngayon. nagagalit ako lalo na sa t'wing magtetext ka na parang wala kang kasalanan. naiinis ako lalo habang naiisip kong nagagalit ako, na alam kong mabait ako at hindi marunong magalit pero dahil sa'yo, pinapalitan nito ang ugali ko. gusto ko sanang kausapin ko o magtext back sa'yo pero hindi ko magawa dahil nauunahan ako ng galit at kawalang tiwala. natatakot ako na baka mapadalas ang text natin at malimutan kong ginawa mo kong tanga. sa tono ng salita ko... alam mong galit ako di ba? kaya tama na. wala na akong nararamdamang pagmamahal sa'yo at hayaan mo na akong maging payapa. kung nagiguilty ka, hindi ko makocontrol ang nararamdaman mo. hindi ko na responsibilidad na tanggalin ang guilt sa puso mo. sayang ang oras kung susubukan pa nating maging magkaibigan. sa ngayon, hindi na muna.

kanina, pagdating ng hapon, kinabahan ako. lalong tumingkad ang duda ko na iba ang araw na to. at totoo nga, bahagyang  pinakalma ako ng tsaa. pero ng bumuhos ang ulan, nasabi kong ito ang araw ko.

sa itaas ng gusaling pinagtatrabahuhan ko, alam kongmaktatagpuan ko ang hinahanap ko. kinilabutan ako sa lamig na dumampi sa katawan ko. alam kong narito, nasa paligid ang hinahanap ko. siguro nga nagdidiliryo ako pero sa mga oras  na ito, alam kong nakatakda ang bago kong mamahalin. alam kong may nagaganap na para sa akin, para sa atin. sa'yo na mamahalin ko at itinakda para sa akin. kung nasaan ka man, alam kong ipinaramdam ka sa akin sa mga oras na ito. alam kong hinahanap mo rin ako. at ngayon... pinag-uugnay tayo ng panahon, maaaring ang lamig na dumampi sa akin ay mula sa buntunghininga mo o ng kaluluwa mong naglalakbay upang makatagpo ako. naniniwala akong matutuklasan kita... sa mga darating na araw.

ngayong bumubuhos ang ulan, iniisip kong hindi ako matatakot, iisipin kong ang buhos ng ulan ay pagkakataon upang makilala natin ang ating mga sarili. hindi tayo magpapayong. dadamhin natin ang panahong ito, ang pagkakataong magtatampisaw tayo sa ulan, waring mga batang sabik sa ulan, waring puso nating sabik na nagkatagpo. at ang pagkikitang iyon ang pagpapainit sa atin.

hahanapin kita. hindi ako maghihintay. susundan ko ang bulong ng panahon. magkikita tayo. manalig ka.