hanggang dito na lang at maraming salamat

napasugod ako sa robinsons para panoorin ang indie film na'to. no expectations. gusto ko lang makita, alamin kung may bago.

tama. may bago. maraming bago.

masarap panoorin ang pelikulang hindi mo alam ang magiging katapusan. pelikulang simple ang tema pero maaaring palalimin.

acceptance.

ito ang simpleng paksa.

nagsimula at tinapos sa pamagat na hanggang dito na lang at maraming salamat.

hindi umikot ang pelikula gaya ng malikhaing pamagat bagkus tuluyan.

gaya ng kulay na rosas na kumawala sa alapaap, kalayaan din ang kinahantungan ng pag-amin at pagtanggap  o ng pagtanggap at pag-amin.

----

isang kaibigan ang umamin sa kanyang kinakasadlakang bisyo sa kasalukuyan, totoong ang pag-amin ay kalayaan subalit hindi madali. lalo pa't naghahanap siya ng sagot kung paano sosolusyunan ang kinasasangkutang gawain.

ako rin. ilang ulit ng umamin. minsan nga ay naiinis ako pag napapansing ang pag-amin ay isang kalayaan upang tanggapin ka, minsan ang pag-amin ay hindi sapat, minsan ang pag-amin ay kasangkapan para mapadali ang lahat at mapatawad ka.

sa totoo lang, may mga bisyong mahirap takasan.

at minsan, dahil tinatanggap nating mahirap itong takasan, lalo tayong hindi nakakawala.